2026-mi januaarip aallaqqaataani atuisunut akit

Atuisunut akit naleqqersuutaat 2025-mi januaarip aallaqqaataaniit 2026-mi januaarip aallaqqaataanut 3,7 pct.-imik qaffappoq, tamannalu nioqqutissat kiffartuussinerillu iluanni akit suli qaffakkiartornerannut takussutissaavoq.

 

Qaffariaat inneqarnermut inuussutissanullu akit qaffanneranik pingaartumik peqquteqarpoq, ataatsimut isigalungu ineriartornermut annertunerpaamik sunniuteqarmata. Inussutissat 3,7 pct.-imik qaffattut ineqarnermut aningaasartuutit 4,7 pct.-imik qaffassimapput.

 

Erseqqissaatigissallugu pisariaqarpoq atuisunut akit naleqqersuutaat atuisup agguaqatigiissillugu aningaasartuutigisartagai, tabel 1-imi takuneqarsinnaasut, tunngavigalungit naatsorsorneqartarmat. Tamannalu isumaqarpoq atuisut tamakkerlugit akit allanngornerannut assigiimmik misigisaqartannginnerannik, inuttut nammineq atuineq tassani apeqqutaalluinnarmat.

 

Atuisunut akit naleqqersuutaat januaarip aallaqqaataanersut aamma juulip aallaqqaataaneersut piffimmi akit qaffasissusaannut kisitsisitigut paasissutissiaapput. Januaarillu aallaqqaataata kingorna akit allannguutigisinnaasaat taamaasilluni naatsorsuutini ilanngunneqanngillat.

 

Titartagaq 1. Atuisunut akit, qaammatit aqqaneq-marluk ingerlanerini qaffariaatit procentinngorlugit, januaari 2022 - januaari 2026

Najoqqutaq: https://bank.stat.gl/PRNPRISV

 

Atuisunut akit ukiup affaanut ineriartornerat

Piffissami 2025-mi juulimiit 2026-mi januaarimut atuisunut akit naleqqersuutaat 1,4 pct.-imik qaffassimavoq. Ineriartorneq tamanna siuliini ukiup affaanut naatsorsukkanut naleqqiullugu ingasanngilaq, taamaattoq aningaasaqarnikkut suli akit ilungersunartumiinnerannik takutitsivoq.

 

2025-mi janaarimiit 2025-mi juulimut akinut naleqqersuutip 2,3 pct.-inik qaffaffigisimasaanut sanilliullugu akit qaffakkiartornerisa sukkassusaat annikinnerulaarpoq. Sulili aningaasartuutaasartuni pingaarnerni soorlu nioqqutissani aamma ineqarnerni akit qaffakkiartorput.

 

Titartagaq 2. Atuisunut akit, ukiup affakkaarlugit allannguutit procentinngorlugit, januaari 2022 - januaari 2026

Najoqqutaq: https://bank.stat.gl/PRNPRISV

 

Nioqqutissaqarfiit ataasiakkaat ineriartornermi sunniutaat

Atuisunut akit naleqqersuutip tamakkiisumik ineriartornera nioqqutissaqarfinnik assigiinngitsunik tunngaveqarpoq, nioqqutissaqarfiillu ilai allanik annerusumik qaffakkiartornermut sunniisarput.

 

Piffissami 2025-mi januaarimiit 2026-mi januaarimut akit qaffariaataannut ineqarnermut aningaasartuutit annertunerpaamik sunniisimavoq, pingaartumik ineqarnermut akiliutip qaffasinnerulernera kiisalu innaallagissamut, imermut kiassarnermullu akit qaffakkiartornerat sunniuteqangaatsiarsimallutik.

 

Killormoortuanillu atisanut isikkatigullu atukkanut nioqqutissaqarfik minnerpaamik sunniuteqarsimavoq, tassani akit -2,2 pct.-inik apparsimammata.

 

Titartagaq 3. Piffissami 2025-mi januaarimiit 2026-mi januaarimut nioqqutissat immikkoortitikkat ukiumut allannguutaat procentinngorlugit

 

Najoqqutaq: https://bank.stat.gl/PRNPRISV

Malugiuk: Nioqqutissaqarfiit atuisunut akit naleqqersuutaanni allannguummut qanoq annertutigisumik sunniuteqarsimanerat takutinneqarpoq. Tamannalu akit allannguutaannik aamma uuttuinermik tunngaveqarpoq.